(Л. 1) Господи Исусе Христе, сыне Божии, помилуй нас. Аминь.

Его чести во мнисех Феофилакту*.

Нижайший во скитающихся Нифонт*.

Имею честь воздать должное благодарным слово[м] за ваше душевное расположение и любовное приветствие моему недостоиньству. Так равно прошу донести благодарное слово ! Его чести Антонию* за его любовное попечение о мне, недостойнем, нижайшаго класса человеке и далече отстоящем [от] вашей мерности.

Затем имею честь объясниться вашей чести, не терпя безчисленных ваших убеждений, которыми вы стараетесь нас присоединить, в вашей, белокриницкой иерархии, которая немногими леты пре-// (Л. 1 об.) жде сего возстановлена уснаственными влиянии иноками Павла и Алимпия*, чрез убежденнаго ими на то греческаго митрополита Амвросия*, который уже был лишен всех прав и по удостоверению и сведетельству Парфения* и самих мнимых архипастырей Антония и Пафнутия*, извержен своим патриархом за страсть сребролюбия и 6 лет жил уже без службы. Се есть первая вина.

Мы же соединится с вами во един дух претящей нам совести не можем, приемше во ум писанное, якоже о том воспоминая нам Христос, глаголя:

Кирил[ова книга],

Знамение 8

Аще рекут вам: се Христос в пустыне есть, еже есть в пустошных и маловременных глаголех, // (Л. 2) не изыдите, ниоткуду не исходите, еже есть от единыя соборныя апостольския церкви^а, от прежныя православныя веры, уставленныя духом святым утверженныя Христом; за новыми ересми и отступники не исходите. Аще рекут вам: зде Христос во храме не имет веры, не уклонитеся от истины^б – Христа, идеже грады и храмы сами Сего могутьством поставляются*.

Важное в притчинах нашего с вами несогласия^в следующее. Первое. Яко митрополит Амвросим сведен с престола митрополии и запрещен от всякаго духовнаго чинодействия своим патриархом по важной вине: за страсть сребролюбия. Этой удавки не мог снять ваш иеромонах Иероним*, а колми паче попустить в деятелное чинодействие высшей сте- // (Л. 2 об.) пени иерарха. Сие дело никоторым правилом и ни бытием оправдано быть не может.

Второе. Яко митрополит Амвросим, по усильственному и мздоимственному вооружению иноков Алимпия и Павла, ради материалных выгод, предложенных ходатаями, согласился с заключением акта: по прибытии еще в Белокринию поставить чрез его рукоположение наместника и двух епископов и обезпечить его в содержание, также равно и сына его с невесткою, при заключении коего поднесено ходатаями Амвросию (пятьсот червонцев) по примеру Симона волхва, принесшаго сребро Петру, верховному апостолом, о чем свидетельствуют // (Л. 3) Деяния святых апостол*. Сия причина нас весма устрашает и заключает вход нам в вашу церковь, и препинает мысли нашей примирится во единость духа с вами.

Зачало

Никон, слово 63 и второе слово 32

3е. Аще бы митрополит Амвросий и волею, кроме извержения, пришел в скит Белокринии, и то не должен творить ничто епископскаго, но в простых мнисех учиняется, о сем тако правило святых отец нас вразумляют. Кормчая. Глава 20. Правило 2*.

4. Причиною и запинанием епископскаго чинодействия следующее:

О рукоположении еретическом, симвлах, книга 3, глава 9, беседа 43: на пятую тайну о священстве. Правило 8 перваго вселенскаго собора, 3-е втораго вселенскаго собора* // (Л. 3 об.) предписывают присоединять к православной церкви не посредством святаго крещения, а посредством святаго миропомазания^г очень важных еретиков, каковы ариане, отвергающие Божество Исуса Христа сына Божия, македонианы, отвергающие Божество святаго Духа. Принимая с писменным от них обязателством удалятися от всех ересей и во всем последовати учению и правилом православной церкви; в толковании же вышереченнных правил диякон великия церкви Алексий Арестин* объяснив кратко от сего пространнее: церковь подает чин присоединения имеющих хиротонию, аще нецыи от них сут[ь] епископы или презвитеры и дияконы.

Аще житие имут непоро- // (Л. 4) чно, от соборныя церкви епископа, в ней же присоединишася, да поставлени будут. Первее вся степени пройти, сиречь поставлену быти четсом поддияконом и диаконом, и презвитером.

1го собора
правило 19*

И пребывати в таковом единаго лета время. И тако аще достоин святительства явится болшей честе да сподобится, еже есть да будет епископ, и в киимждо степени да пребудет время немало, да житие их и вера на толице времени искусится, инако же быти не прощаем. Аще же в той церкви несть истиннаго епископа, в ню же пришедыи от еретик епископ или презвитер, или ин от причта, прияти да будут от тоя церкви презвитера, прощаем бо оным непомазуемым быти святым миром. // (Л. 4 об.)

Точию прокленьшим своя ереси, и иныя вся доволни будут ина общение прияти. Аще же нецыи от них суть и епископи в презвитер место да сведутся; дондеже разрешени будут от тоя области митрополита, сиречь киевскаго. Презвитери же имут честь, якоже имеша у самих первее, тако же и диякони. В той же церкви, в ней же присоединишася, да не имеют первенства. Да почтен будет той презвитер, иже первее ту бысть, и укажет пришедшему церковь празную, не имущую презвитера. А презвитери же без воли епископли не имут власти пришедших от еретик епископов или презвитеров и прочих от причта мазати святым миром, ибо не имут власти поставляти // (Л. 5) таковыя по степенем: хиротоницати в той сан, в нем же быша. Но посылати к церкви, в ней же есть епископ. И той да творит с волею митрополита. Кроме же сих действуям^д несть приобщен ниже православен, не даемая приемляи: да имать суд поепитомен, сиречь согласно правил.

Согласно же сему еще пишет известный поборник православия Захарий Копистенский в главе 40 своей книги о правдивой единости православной християнской церкви восточной, лист 129*, и в Кормчей, лист 293 на обороте.

Сих ради вышеописанных вин и видимой несправедливости в прииме Амвросия, к болшему и значителному сомнению имеем в виду то, яко греческая це- // (Л. 5 об.) рковь от времени восмаго Флоренскаго собора очень близко подошла к папизму, что видится из Деяния, писаннаго о том соборе*. Никон Черныя горы, на многих местех исправляя погрешности восточнаго духовенства, во своих посланиях поминает о нарушении формы и устава восточной церкви и слабой их жизни, а наипаче в 40 слове^е, десятом том [ж]е послании*. Так же равно и Симеон Солунский во своей книге сице пишет: последование великия церкви устава в нынешнем времени в прочих убо церквах не действуется, ниже в самом христолюбивом и царьствующем граде. Зане и той некогда от латинов пленен и доброе погуби, и предревнее обыкно- // (Л. 6) вение; глава 301 и 303*. И на прочих местех многащи о сем упомяну сего ради и о крещении греков сомнителны. Яко по примеру руссийской церкви, не действуют ли греки в крещении обоюдно, сиречь погружением и обливанием, якоже и росийская законучители в Потребники не вводят, во всеобдержный закон, а на практике обоюдно действуют. Наши предки весма опасались таковой хиротонии, дабы не зачерпнуть ветхаго кваса, с западным пересолом смешаннаго. Хотя они и принимали хиротонию на руских священниках, и то великия ради нужды, пока она не пресечеся возшедшими на высшия степени духовными лицами, имущи- // (Л. 6 об.) ми на себе обливателное крещение, о чем ясно свидетельствуют ихния рукописи о взыскании священства.

Толковый Апостол
лист 549

Еще к сему нам подает Иоанн Златоустыи ясное понятие*: яко кроме крещения никоторая тайна от еретик не бывает прията церковию. Согласно сему вси правила святых гласят: яко прием от ереси приходящих во святителском чину, котории подлежали под миропомазание, на тех и хиротония повторялась постепенно архиерейскою рукою. Почему и ваш архипастырь Амвросим по приеме остается простым монахом.

1е. Яко сверженныи с престола митрополии своим патриархом.

Второе. Яко мздою сребролюбия прельщен бысть и другими выгодами, поддержания ра- // (Л. 7) ди жизни своей и семейства.

3е. Яко простым иеромонахом прием его бысть, который не мог его разрешить точию того греха, за который он обнажен бысть власти и звания высшей степени архиерея, по примеру онех скопцов, о них же пишется в Прологу: которыи оправдывали себя обошли всех патриарх и дошли до Епифания Кипрскаго, вси единаково имеяху их связанных, дондеже не познали свой грех и пришли в чистосердечное раскаяние. Потом же прощением епифаниевым получиша разрешение и простыню своему греху от связавшаго их архиерея.

Когда Иероним, простый иеромонах, не имея власти точию от греха разрешити, без архиерей- // (Л. 7 об.) ския власти, а колми паче подати достоиньство высшей степени духовной силы митрополиту Амвросиму. По словеси симвлаха. Яко презвитери не имут власт[ь] пришедших от еретик епископов или презвитеров и прочих от причта мазати святым миром без воли епископа, ибо не имут власти поставляти таковыя по степенем, сиречь хиротонисати в той сан, в нем же быша.

Соборник
в сре[ду] 5я недели

Еще к сему смотрите притчю Кирила мниха о душы и о теле*; разумеем точно по оной збылося на митрополите Амвросиме.

в Марг[арите],
зачало 8

Блюдите, старцы честнии^ж, яко и ныне недалече есть имеяй власть опровергати трапезы торжником и седалища продающих голуби*. // (Л. 8^з) Изгоняет и сановники, незаконно содержащия престолы церковнаго управления. Сих ради^и ясных доказательств не впадите сами в ту яму, которую копаете нам, сурьезными вашими выражениями чрез бесчисленыя писма ваша, угрожающая писанным в Потребнике на листе 57м.

Соборник, лист 442

Ничтоже бо тако любезно, якоже не возноситися в санех, и ничтоже тако мерзит ему, якоже самомнимая величавая гордость*.

Апокалипсис,
глава 18

Вы хвалитесь точно теми же словесы, яко же упомянутая во Откровении Иоанна Богослова гордо оболченная в порфиру и в червленицу и прочими монисты украшеная жена, и глаголете: сежу царицею и вдова несмь и рыдания не имам виде // (Л. 8 об.) ти*.

Господь же гордым противится, смиреным дает благодать. Мы хотя и исправляемся в нужных обстоятелствах около себя, но не превышая меру своего достоиньства, и не поставляем себя во учителство вселенныя, но к требующим слова глаголем о делных более, а не о догматех веры, яко видим погибающую добродетель в мире.

[Евангелие от] Луки
зачало 88

Не дерзаем в незаходимая, мысленно поставим себя в притворе церковьнем, в месте сына блуднаго, ударим в перси и пролием слезы, воздвигнем глас мытарев:

Боже милостив и прочее*.

Восприимем вдовино дерзновение, негли и мы преклоним на милость благутробнаго судию праведное на нас негодование. // (Л. 9)

Затем умыслих открыть хранимое мною внутрь сердца моего правое веры исповедание, по глаголу верховнаго апостола Павла: сердцем веруется в правду, усты же исповедуется во спасение*, не терплю бо порицатися титлою еретичества, но единодушно взываю с чады святыя соборныя апостольския церкви сице:

Верую в единаго Бога^й в Троице^к славимаго отца и сына и святаго духа единосущну и неразделну. Такоже и в воплощение сына Божия верую, и совершена Бога и совершена человека того исповедую, и прочее исповедание православныя веры все приемлю и исповедаю всею моею душею. Такоже и госпожу мою, святую и пречистую сущую // (Л. 9 об.) Богородицу, со многою верою и любовию исповедаю и величаю, и славлю, и вся святыя почитаю и приемлю и прославляю, и соединяюся благодатию Христовою, и прибегаю вседушно к святей соборней апостольстей церкви, и вся учения, яже прият от Господа и святых апостол, и святых отец вселенских собор, и поместных, и прочих святых отец, святая церкви приемши нам предаст о православной вере и делных завещании. Сия вся приемлю и почитаю со многою верою и любовию. Лжеименитых учителей еретическая учения и предания вся проклинаю и мудрых словоотбретник любопрителная разглагольствия отметаю, аз, и сущии со мною; и еретики вси, с ними же и богомили, чюжди нам // (Л. 10) да будут. По сем, приемше глагол блаженнаго Симеона, архиепископа Селунскаго, реченный к некоему от латинския части, потязующему блаженнаго яко невоздающа достойной чести наместнику престола верховнаго апостол Петра и прочих по нем благочестивых пап –

Глава 23

сице отвеща блаженныи: Яко не папы мы^л отвергаемся весма, ниже ему есмы непричастницы, паче же едино ес[ть] мы с ним, якоже Исусом Христом, и отца Его мним и пастыря, якоже с папою мы Петром, Илином, Климентом, Стефаном, Ипполитом, Селивестром, Инокентием, Л[ь]вом, Агапитом, Мартином и Агафоном, и прочими сим подобным папам, патриархом, архиепископом // (Л. 10 об.) и епископом [и прочей власти духовной]^м приобщение неразделное о Христе и соединение имеем, и никое слово нас разлучит от них. Яко священныя памяти их совершающе празднуем всем, учителя имуще сих и отцев нарицающе, зане и символ их веры непорочно веруем и содержим, и якоже предаша души Христу в символе, и мы предаем. Аще кто подобен сим символом верою, житием и обычаем православия – приобщен сей нам и отца, и якоже Петра его имеем, и соединение на много время нам и во веки веком да будет*. Сице и аз, спохитив глагол Симеона Блаженнаго, разсуждая, вам реку: аще бы и ваш митрополит Ам- (Л. 11) вросим не был извержен и притек к церкви православной путем истиннаго Петрова покаяния, а не нравом cребролюбия Симона Самарийскаго, тогда бы и сего имели приобщена вкупе и вас с ним. Еще, честнии отцы, хощу вам сокращенно воспомянути: да воздвигните мысленное око на предсказания святых отец, что рекли от хотящих быть раздорех и распрях по вере, о строительстве учителей осмаго века и о растлении всего рода християнскаго. Из книги Максима Грека слово 2, глава 9: идеже бо аще вселенныя простреши мысленное око душы, тамо всяко обрящеши множащюся и омрачающю тме нечестия хри- // (Л. 11 об.) стоборцов измаильтян, наченшу убо от лет Ираклия, царя греческаго* и простерту даже до сего времени, ей убо и в последующее пребыти хотящу, якоже аз от божественных писаний учим бываю, даже и до явления самого богоборца Антихриста, еже не зело далече есть, но при дверех уже стоит, якоже божественная писания учат нас явственно, глаголюща: На осмом веце быти хотящу всем устроению, сиречь греческия области престатие и началу мучительства богоборца Антихриста и второму на землю Спаса Христа пришествию, а якоже недалече стоит сице чаемое благоверных всех устроение, явственно есть и от иных многих яснейших писанных показании и Предании, // (Л. 12) и наипаче от них же блаженый апостол Павел пишет во еже к солуняном послании втором, уча их хотящая быти знамения прежде Господня втораго пришествия: никтоже вас, рече, да прелщает ни по единому образу. Аще бо не приидет отступление прежде и открыется человек греха, сын погибелный, противляяся и превозносяйся над всякаго глаголемаго Бога, и тщилища яко ему сести в церкви Божии аки Богу* и прочая, отступление же сиречь преложение язык от непорочныя и правыя християнския веры на различьныя богомерзския ереси и на христоборное безверие агарян. Когда иногда болшее нынешняго чаем видети или слышати ? Где, яже во благоверии и честности благоле- // (Л. 12 об.) пной возсиявшия красоты, вкупе и слава бывших верных во Иеросалиме и Александрии египетстей, и Ливии, и Антиохии ? Где, теплота она и ревность божественная восиявших в посте, в ските и горней Вифаиде, и в различных странах, и в горах богоносных и равноаггельных отец наших ? Где яже во благоверии возразрастшая высота пресловущая и похвала всех западных язык святая, глаголю, соборная и апостольская церковь ветхаго Рима ?

Не сия ли видим ныне ? Ова убо обладана бывша, ова же и запусьтеша от безбожных агарян, ова же охуждена и непотребна быша до конца различными, их же началник есть той, иже прежепомянутый во всяком благоверии и житии честном и в премудрости древний Рим и яже о нем прочая // (Л. 13) Италия. Иди мысленным оком души во Индию и Ефиопию, последьних концы вселенныя, и тамо обрящеши всяко безобразие искушении всяческих ересей, есть где и агарянское нечестие, узриши тамошния языки прельщающа и к себе прелагающая, где различьная восточныя верныя языки. От них же свет благоверия начен сияти при божественных апостолех, ими и к нам, европианом, разлияся. Не сия ли вся без мала агарянская нечесьтивая тма, ова убо к себе уже преложи, ова непотребствова и озлоби, и растлили есть душевне, и растлевают всегда всяким образом, что не глаголю болшее всех бывших пресловутых слышаний же и видений, где высота неприкладная, и словеса, // (Л. 13 об.) елика во области и премудрости всякой добродетели и благозаконии и православней вере царствия православных християнких царей, царьствовавщих во всеславнем и благочестнем граде Констанстина великаго ? Где всемирный он свет благоверия, иже подобне солнца осиявая вселенную архиерействовавшими в нем равноаггельными святители ? Не сия ли вся леты уже доволными работна суть и подручна измаильтяном ? И ниоткуду же избавление нам несть, но всегда убо яже по нас на горшее, а яже по их во еже славнее присходит. Уразумеем мысленно, в каково злочестие ны доидоша, яже о нас бедных греков вещи, како всех онех благих вкупе лишихомся паче всех. Кормчая, лист 26. Подобно сему сви- // (Л. 14) детельствует Феофан, патриарх Еросалимский, в ставной грамоте Филарета патриарха о уничтожении славы всего Востока, Палестины и Грецыи*.

О славе и благочестии московскаго государьства
до патриаршества Никонова.

Максим Грек

В послании своем ко князю Василию, якоже выше писах ти и ныне глаголю: Блюди и внемли, благочестивый царю, яко вся християнская царства снидошася в твое едино царство, яко два Рима падоша, третий стоит, а четвертому не быти. Уже твое християнское царство инем не останется.

Предисловие
Кормчия,
лист 22 и 26

Сия такожде свидетелствуют два патриарха. Иеремия, Константинопольский, в ставных грамотах русских патриарх[ов]*.

Зри паки; в той же Кормчий // (Л. 14 об.) низлагается хвала рускаго духовнаго законуправления: закладывая первым тиснением при московской типографии книгу Кормчию, Иосиф патриарх испусти огорчителный стонания глас, который в предисловии его раздается следующими словами*: Погибе вера, погибе наказание, погибоша училища детей, погибоша исправляющии божественная писания, погибоша п[o]учающиися в православных догматех, погибе, по пророку, крепкии, погибе сила хлеба и воды, погибе исполин и человек-ратник, и судия, и пророк, погибе смотреливый и старец, и пятьдесятник, и дивный советник, и премудр художник, и разумный послушник, и поставиша себе юноши за князи и ругатели да обладают ими*. Не ту не убо мы, православный (Л. 15) читателю, приидохом на сия словеса, но самовидцы есмы предиреченным, не могохом взирати на хуления богостудных человек и удержати я, яже восташа на церковныя уставы наши и взаконение: вина же сему ничтоже, точию нерадение наше.

Предисловие 2е,
лист 3
Исайя, 3

Выше рекошася о сем сице: видя же враг и^н добра ненавистник диявол, яко рог его сим духовным сжат есть мечем^о, воста иною на православных кознию: сотвори убо мало тишины, даже леность и нерадение о божественных догматех и о преданиях благочестивых введет^п и всех празности и миролюбия научит, сему же содеявшуся вся наша ниспадаху: восташа бо по божественному апостолу, глаголющему: Чело- // (Л. 15 об.) вецы сластолюбцы, сребролюбцы, величавы, горди, самолюбцы паче нежели боголюбцы, имуще образ благочестия, силы же его отвергшеся*;

Матфей 11

не точию же се в мирских человецех обретеся, но паче и в духовных, их же именует Писание свет миру*,

псалом 13

сиреч[ь] во святителех пастырех и иереох, сице вси уклонишася вкупе неключими быша, несть творяи благостыни, несть до единаго^р *. Возри убо, аще нелепостен еси, обрящеши ли где праве исправленную без всякаго порока в церквах святых книгу ? Обрящеши ли чин и последование по указанному святых и богоносных отец взаконению ? Обрящеши ли суд и отмщение в вещех церковных, или строителя, или началника, праве исправляюща слово истинны, и по чину вся бываю- // (Л. 16) щая в церкви, но вем, яко неудобь обрести возможеши не точию в соборных градских церквах, но ниже в епископиях, паче же ни в монастырех, виждь убо, аще не плача достойна суть сия окаянная времена наша, в ня же, увы, достигохом. Дозде предисловее Кормчия. И паки:

псалом 68,
[Евангелие от]
Иоанн[а гл.] 2
зачало 6

Помянух бо словеса пророческая, яже некогда и Господь наш, Исус Христос рече: Жалость дому твоего снесть Мя*, кто бо есть от благоверных и благоразумных, егоже не подвиже жалость, зряще ветхость церкви Христовы, на падение клонящюся, или кто не смирится и не смутится,

псалом 79

виде виноград, Богом насажденный, егоже обмают вси мимоходящии путем, разорения ради оплотов его ? И поя- // (Л. 16 об.) дает инок дивии, и вепрь от луга озоба и*. И никтоже может стати противу ярости его.

Ефрем,
зачало 233

Скудости ради духовныя броня, еже есть слово Господне, или кто не умилит сердца своего и не плачется, зряще разорение церкве[й] Христовых и испровержену хвалу ея ? И яко волцы тяжцы нещадно расхищают и распужают овчее стадо Христово: различныя бо супостаты и многообразныя лукавства обстоят нас*.

Книга Небеса
лист 9 и на об.
Иезекииль, глава 7

Григорий Богослов, слово первое, поношая нерадивость пастырей: Горе на горе будет, и весть на весть*, изыщется видение от пророка, и закон погибе от иерея, и совет от презвитера*.

Иезекииль, глава 24

Ныне же во онех паки. Сыне человечь рцы ему: Ты еси земля недождима, ниже дождь бысть на тебе в день гнева, егоже вождьствующий посреде его, яко львы // (Л. 17) рыкающе, хищающе хищения, души снедающе в могутьстве*. И паки: иерей его отвергаху закон мой и оскверняху святая моя, скверным же и святым глаголет, не разлучаху, но вся бяху им едино.

Глава 34

И паки о пасущих себе глаголашася: млеко снедающих, и волной одеющихся, и толстое закалающих, но не пасущих овец; изнемогшаго не укрепляющих, и сокрушенное не обязующих, и блудящаго не обращающих, и погибшаго не взыскующих, и крепкаго не хранящих, но трудом делающих и по тщанию погубляющих. Яко разсеяшася овцы по всем поле и горе, за еже не быти пастырем, и быти снедь в снедь птицам и зверем, несущу искупующу и обращающю. Таж что. Живу Аз, глаголет Господь, вместо сих еже бы упа- // (Л. 17 об.^с) сеном быти овцам, быша в расхищение: се Аз на пастыри. И изыщу овцы Моя из рук их и овыя убо соберу и соблюду. Сии же приимут по делом, яже злым пастырем лепо*.

Никон [Черногорец] послание 22

Дозде Богослов: Погибоша совершеннии и божественныя правила и заповеди Господня, и отнюдь в памяти о неких несут ниже в деянии, но человеческая коемуждо по своей воле и хотению, и бысть зде глагол Господень, глаголаи, яко оставиша заповедь Божию и человеческа паче предания внимают*; и сего ради увы Мне, предани быхом во языцех. Обаче чювственнаго чина во языцех, Божие же предание в мысленных не предаваемо есть, яко же Господь изрече, внегда рещи Петру: И на сем камени созижду церковь // (Л. 18) мою, и врата адова не одолеют ей. И сего ради в которомждо по пророчеству святых отец исправление остало есть, со врачеванием божественных писаний и предварших святых собор божественными правилы, и их же от святаго духа изложеными завещаньми. Еже воспомяну вселенскаго учителя Иоанна Златоустаго словеса, глаголанная о знамениях на скончание века*, в котором, описывая нерадивость пастырей осмаго века и непокорство пасомых Маргарит, Слово о лжеучителех по мнозех глаголех, оберегая ищущих спасения, глаголет сице:

Послание 32, лист 177 на обороте*

Послание 22,
лист 137*

лист 590

Разумейте, возлюбленнии божественнии, божественным писанием глаголющая, и не смешайтеся с делающими беззаконие. Мнози бо сут[ь] учители изгибели, и еще множитися имут*. // (Л. 18 об.) Блюдитеся убо, яко дние лукави суть, и время своя слуги собирает, но не почюдитеся сему, аще и волцы будут пастуси. Ко епископом бо и презвитером беседуя, апостол глаголаше: Яко от вас самех востати имут мужие, глаголюще развращенная. Тем же никтоже да прельстит вы. Иже извне имеяи образ ангелеск, внутри дьяволск. От плодов бо их познавати, самем Господем учими есмы. И паки: Да егда видиши неустроение и смущение, не ниспадешися, но к Писанию прибегнеши, ниже поколеблешися ума твоего. Егда видиши много неразумеющих, не дивися, подобает бо сим быти.

Егда видиши лжепророки, воспомяни владыку, Глаголюща, яко востанут лжехри- // (Л. 19) сти и лжепророцы. Егда видиши прелеснословесники и баснословцы, воспомяни пророка, глаголюща: Горе пишущим лукавство. И прочее. По мнозех таковых глаголаниих приступиша к нему люботруднии рачители, рекоша сице: Слышим и мы, братия, и не отчаем надежду своего спасения. Но якоже сия возвестив и на среду привед, удивив и устрашив, покажи нам прочее спасения образы, даждь язвам исцеления, якоже известил еси удивляющая, лютая и жестокая, рцы и радостотворная.

Се спастися хощю, что сотворю ? Како спасуся и кий образ восприиму ? К кому прибегну ? Много бо согреших и делом, и словом, и умом, самохотением, во дни- // (Л. 19 об.) и в нощи, и по вся часы. Тем же что сотворю, како ли спасуся, к кому прибегну ? Аз повем, к кому прибегати.

Блаженный бо Давид показа, к кому прибегати, рече: Бог нам прибежище и сила, помощник в скорбех, обретших ны зело. Сего показа Иоанн, болший всех пророк, глаголя: Се агнец Божии, вземля и грехи всего мира, сего благовести аггел, глаголя праведному Иосифу: Той спасет люди своя от грех их. И паки Давид глаголет: Господи, к Тебе прибегох, к Тому и ты прибегнии, возлюбленне. Тем же подвигнися присно готов быти, да егда приидет изяти душю твою, обрящет тя готова в покаянии. И аз ти споручаюся и уповаю, яко не отлучит тя спасающихся. Паки^т. И ты, возлюбленне, не // (Л. 20) ожидай часа, ни места различия, но на всяком месте: и в дому своем, и в церкви сыи, и где любо будеши, моли Его, всяко бо место есть Божия власть. Внушите вси, живущии на вселенней, вкупе: богат и убог, мужеск пол и женск, черноризец и мирский, стар и юн, девы, старцы земнии, царие и вси судящии земли. Поминайте же^у мя всегда, братие, и держите предания, яже приясте от святых муж, от пророк и апостол, и владыки всех.

Беседа к римлянам, глава 9, стих 28, лист 303*: несть потреба обхождения, ни трудов, и беды сущия от дел законных, но со многим скращением будет спасение. Тако бо есть вера: в кратких глаголех имать спасение. Аще бо исповеси, рече усты своими Господа // (Л. 20 об.) Исуса, и уверуеши в сердцы твое, яко Бог воздвиже Его из мертвых, спасешися.

лист 311 и 312*

И паки: что же есть, близ тебе глагол есть, сиреч удобно ест, в мысли бо твоей и на языце спасение. Не далекий путь шествовати, ниже пучину плывшим, ниже горы преходящим, тако достоит спастися. Но аще ниже той восхощеши преходити праг, достоит ти и в дому седящу спастися. Во устнах бо твоих и в сердцы твоем спасения есть вина.

Никон, слово 18, лист 135. Беседа на Иоана, зачало 21. Аще нерадиво учителево житие будет, мы себе внимаем, слышаще пророка, глаголюща: И будут вси научени Богом, и не научит кождо искренняго своего, глаголя: Познай Господа, яко вси уведят // (Л. 21) мя от мала и до велика, не имаши добродетелна учителя, егоже единаго учителя подобает нарицати и от него научитися, сам бо рече: Научитеся от мене, яко кроток есмь и смирен сердцем. Да не внимает кождо [нерадиву]^ф учителю, но Христу и учительству Христову. Отнюду приими образ изряден, ко оному воображению вообрази себе; безчисленни суть образи, лежаще во святых Писаниих добродетелных^х житий, и иже аще хощеши, от сих держи и пучатели: прииди ко учеником и смотри тех жития, ов убо нестяжанием просия, ов же имений ради, сиречь Илия // (Л. 21 об.) нестяжанием, Авраам же стяжательством, ниже по ряду святии вси такожде. И еже аще мниши легчайше и приличнейше – сим шествуй; и ов убо пощением, ов же без пощения Богу угодиша.

филипийцам,
нравоучение 12

тогож от Матфея

Безчисленнии суть образи житей, в писаниих лежащии, яко аще хощеши, прииди и после учителя во ученицех*. И паки: но несть ти учитель добродетелен от человек ни един же, ниже иже в таковых живет; многа тебе похвала будет, яко не имый учителя, дивен был еси*. Ибо возможно се и зело удобно аще хощем, и являют первии сия исправльшии, сиречь Ное, Авраам, Мелхиседек, Иов и иже по сих мнози, и вси человецы.

О сугубей церкви

Свидетелство // (Л. 22) от священнаго Писания о сугубой церкве,
и како ю врата адова не одолеют.

Евангелие, в третию неделю поста


[Евангелие от]
Матфея, зачало 67

Беседа на
Пятидесятницу

Святый Иоан Златоустый глаголет: Понеже сугуб человек, сугубо есть и освящение, освящает бо ся душа верою, освящает же ся и тело исповеданием*. Тело бо видимо и чювственно, а душа невидима и неосязаема. Тако же сугубу и церковь разумею, о которой Спаситель Христос ко апостолу Петру глагола: Ты еси Петр, и на сем камени созижду церковь Мою, и врата адова не одолеют ей*. О сем разсуждая Иоанн Златоустыи: Кая же глаголы ? Кая словеса ? – Ты еси Петр, и на сем камени созиждю церковь Мою, и врата адова не одолеют ей. На сем Камени; // (Л. 22 об.) не рече: На Петре, ибо не на человеце, но на вере Христос основа церковь Свою. Кая же есть вера ? – ты еси Христос, сын Бога живаго, каменем нарече церковь, яже обуревания приемлет и не поколеблется, ратование церковь, искушение всякое приемлет, но обаче не бывает побеждена. Но вопросиши ли: Аще камение, или древеса, или железо имать здание то ? Несть отвещает: Не есть в ней здания частей вещественых, понеже аще таково бы было, вскоре бы ся разрушило, но исповедание благочестия ни бесове, ни ина кая тварь победити могут. Свидетельсвуют мученицы, их же ребра стружеми бяху, но вера не сокрушашеся от новых вещей ! Стена прокоповашеся, // (Л. 23) а сокровище не украдеся, сечимо тело, но вера не преломися: такова есть мученическая сила. Ибо на сем камени созижду церковь Мою и врата адова не одолеют ей. Употребите мысленно сия глаголы. Врата адова^ц беды нарицает раждающая смерть. И паки. Тем же зело церковь Богу любезна есть, не яже стенами построена, но яже верою ограждена есть.

Никон [Черногорец]
Послание 22
лист 134*

Соборная бо церкви не стены сут[ь], но правая учения и предания божественных правил и святых апостол, якоже рече Господь к верховному апостолом: Ты еси Петр, и на сем камени созижду церковь Мою, и врата адова не одолеют ей. Видели, кая есть соборная церкви, сам бо великий // (Л. 23 об.) Петр первее, но и Антиохия многажды разрушены быша от язык. Закони же и предания божественых отец и божественныя правила пребывают неразрушена во веки от держащих та, якоже у святаго онаго апостола

Никон [Черногорец]
Послание 32
лист 177 на обороте*

Петра по словеси Господню. Обаче чювственнаго чина во языцех, Божие же предание в мысленных не предаемо есть, яко же Господь изрече, внегда рещи Петру: И на сем камени созижду церковь Мою, и врата адова не одолеют ей.

Златоуст к коринфянам. Беседа 30, лист 510*.

Ибо церкови имя не разделения, но съединения и согласия есть имя.

Ниже, лист 511*

Показуя бо, яко еже по вселеньней единой достоит быти церкви, аще и месты многими разделенной и много наипаче, яже в Коринфе. Аще ли место разде- // (Л. 24) ляет, но Господь сочетовает их общий сыи. Много же сие оного господьственейше, якоже бо иже на едином месте сущии, егда многи имут противныя владыки, растерзани суть и ничтоже от места к единению ползуются. Различная владыкам завещавающим и к себе влекущим.

[Евангелие от]
Матфея, 16, 18

Не можете бо рече, Богу служити и мамоне, сице иже в различьных местех сущии, аще неразличных имут господий, но единаго токмо*, ничтоже от места к единению вреждаются, Господу единому, сочетовающу их.

Ниже, лист 512


Предисловие,
беседа на Деяния*







[Иоанн] Златоуст, [беседа
на 1 послание к] коринфянам
и беседа 1я на Иоана,
беседа 65;
3я Беседа, книги 6:
на Луку глава 93*

Никая же бо нам полза, аще со всеми мирны есмы, к Богу же ополчаеми, якоже ниже вредно нам, аще от всех ратуеми, с Богом же мир водим*. // (Л. 24 об.) вси нас отвращаются и ненавидят, Бог же приемлет и любит. Сия есть церковь, яве яко во Иерусалиме, а не инде, церковь Господа и Спаса нашего Исуса Христа. Церковь, глаголю, едина святая соборная кафолическая и апостольская, духом святым начата, и апостолы основана бысть. Отнюду же Иерусалимская церковь материю бысть и есть всех во всем мире православных церквей, зане от Ерусалима Евангелие, апостоли, проповедь, крещение и вера изыдоша, и оттуду християнство насадися и возрасте, о нем же и пророк велегласный провозвести, глаголя: И по сих прозовешися град праведный мати градовом верныи Сионе, иже есть // (Л. 25) во Иерусалиме. Сиону и Ерусалиму сия слава и имя дадеся, а яже в диоцезиях и в странах церкви поместны да не пщутся быти, а не оною единою соборною, юже в символе исповедуем, но обаче единою святою соборною и апостольскою церковию по вселенней есть церковь Христова, сиреч[ь] людие правовернии и православнии. Иже по исповедании символа соборнаго, на всяк день церковию вещаемаго и глашаемаго увериша. Дозде предисловие: Беседы на Деяние.

глава 308



Небеса, 3; Богослов, слово 28, лист 143*Кормчая
толков. прав[ило]
поместного собора
в Гангре лист 61
и правило святых
апостол восмидесято[е] и 81; Кормчия, глав[а] 3* псалом 54

[На послание к]
Ефесе[н]ом
нрав[учение] 10

Ефесе[н]ом
бесед[а] 10

Подобно сему и Симеон Блаженный, архиепископ Селунский, пишет: Чего ради утро и вечер символ веры глаголем ?* О сем некто от преподобных глаголет: Яко подобает веру поведати утро и вечер, да яко аще прии- // (Л. 25 об.) дет смерть, нас обрящет во исповедании. Разсуждение: зрите, люботруднии рачителие и вси ищущии душевнаго спасения, и не ужасайтеся, яко отстояние телесное от чювственныя церкви не творит препинания душевному спасению, человеку правоверующу, негде уклонившемуся и себе внимающему, кроме высимаго и гордаго помысла, и собратися на общую молитву союзу ради мирнаго мощно есть, даже во время мирное невозбранно, а колми паче, егда вся наша зыблются и колеблющеся трясутся, яко и концы вселенныя, в позори и рати глухой некоей и ниже имя имущей, понеже возниче безчисленное любопрение и востание многообразных ересей, християны убо на- // (Л. 26) рицаются вси, мнениями разделившеся. Сего ради, приемше во ум реченное пророком: Удалихся, бегая, и водворихся в пустыни; чаях Бога, спасающаго мя от малодушия и бури, яко видех беззаконие и пререкание во граде*, не взыщем ли и мы постигнути гор, от среды изшедше, яко от супостатнаго и чюжаго, а не от своего си тела, отторгшеся. Не разделяет бо ся единость веры телеснаго ради отстояния, занеже не отстоит тело духа, якоже Златоуст вещает, иже везде сущии по вселеньней вернии, и бывшии, и быти хотящии, паки и иже прежде Христова пришествия благугодившии; едино тело суть, ему же глава есть Христос*. // (Л. 26 об.)

Небеса, слов[о]
лист 32*




Глав[ы] 1 и 10

Надсловие

Отселе уже скратим наше слово, уклоняющеся любопрения горделивых, вся бо мудрос[ть] на языце обносима, и в словопрении достоверство их, приемше слово верховнаго апостол Павла: глаголет бо, аще кто мнится любопрителныи быти в вас, мы сицевый обычай не имамы, ниже церковь Божия нам же являема и пишемаго слово кратко. Болшее же действо о внутренем человеце, иже и зрителя могуще привлачити на умственное, ему же и паче многия изучаем, якоже и Симеон, архиепископ Селунский, словесами любопрителными претися и братися отрек есть*, чюждо бо, глаголя, сие церкви, но смирением и делами любве духовныя и непорочным житием // (Л. 27) свидетельствующим веру, якоже и апостоли научиша же и показаша. Андрей, архиепископ Кесарийский, в Толковании на Апокалипсис к простейшим глаголет: Елма убо в таковых обретословцем противу стати за простоту нрава не можете, аки глубины сатанинския не знавше, яко глаголете, не ищу от вас брани словом, но хранения учения, еже приясте, дондеже отсюду вас приму*.

глава 3, стих 5

И паки. Поминайте убо, како приял еси и слышал еси, и предание, еже от апостол приял еси, соблюди, и о лености твоей покайся.

Симеон Солунский, глава 10*

Не всех бо слово дати нужно, якоже прежде рехом, но ищущим учитися беседовати с миром, их же паки претися произволяющим // (Л. 27 об.)

Никон [Черногорец] слово 18*











слово 14
лист 66*

отлучатися. Климент, папа Римский, глаголет: Праведно убо и преподобно есть, мужие и братие, послушником нам быти Божиим паче, нежели в гордости и неустроении скорбных рвении яко началником последовати. Вред бо немал паче велику беду пострадати имамы, и аще самы вдамы себе хотением человеческим, иже привлачатны в ереси и распря, еже оттуждати нас от добраго желания. Последуем паче в благочестии мирующим, а не иже с лицемерием мир советующим, пишет бо, людие сии устнами чтут Мя, сердце же их далече отстоит от Мене. Прилепимся убо неповинным и праведным, суть бо таковии избраннии Божии. Писано бо есть, яко прилепляющиися святым – святятся // (Л. 28) И Господь глаголет: Исповедающаго Мя пред человеки, исповем его и Аз пред отцем Моим. В чесом бо его исповедуем ? – во еже творити, еже глаголет, и не преслушати заповеди его. Григорий Богослов глаголет: Яко от крамолы и любопрения, разделения и востания друг на друга вход имать антихрист в мир. От того человеческое могутьство связуемо бывает веригою неразрешимых уз, а диявол разрешлется от узы и встает на нас.

тогож слово 1,
лист 7*

Лучьше бо своя меры ведати хитростие, нежели иных браздодержцем быти нехудожным, и слух подлагати паче, нежели язык двизати ненаказан. Лучше побеждатися добре, нежели побеждати // (Л. 28 об.) приблазненне и нелепотственне. Вопросим и мы, якоже Богослов у родителя, наставления: Рцы, глаголет мудрый, коим законом приводително, коих же бегателно.

ниже, лист 13
слово 7*

Наипаче же в нынешнем времени, егда пастырие безумствоваша и разсеяша овцы пажити, да с пророком возрыдаю^ч: Како немощное подкреплю и падшее возставлю, и блудящее обращу, и погибшее взыщю, и сохраню крепкое ? Како сим научюся и сохраню, по правому пастырства слову и нашему ? Но да не буду зол пастыр[ь], млеко снедая, волнами одеваяся и тучная закалая или продавая, и ина оставль зверем и стремнинам, пасуше себе самих, а не овцы, сим бо поношахуся древнии предстателие израильтяне. Дозде Богослов. // (Л. 29)

Засим просим вас, честнейшая братия, прияти сие наше малое люботрудствование за велико и разсудити благоразумно, понеже благое разсуждение всего полезнее ко спасению, како вышеписанными зде писаньми показуется, яко уже доспехом на самую громаду злобы и постигохом тех времен, от них же предрекоша пророцы, яко оскудеют овцы от пищи, и не будет волов при яслех, и прочее. Церковное нестроение, во учителех развращение и всенародное безчиние – не сия ли вся представляет натура жития настоящаго времяни пред очесы наша ?

Маргарит
о лжеучителех и
Ипполит в неделю мясопустную*
Ефрем, слово 105

Обратите внимание на словеса Иоанна Златоустаго, Ипполита, папы Римскаго, и Ефрема Сирина и прочих // (Л. 29 об.) святых сего ради. Тии же святии упредивше нас, рекоша тако: уне есть ни от единаго водиму и наставляему быти, нежели от злаго по вере наставлятися. Инако и кроме таковых пастырей спастися имущим веру праву с житием возможно. Аще и сокращенно сие наше писание, но хотящим благопокорно и непрекословно послушати, паче внимающим своему спасению и малое сие показание писания известити и научити о сем доволно есть. Недугающаго же гордостным самомнением и не хотящим писанием святых отец покоритися, и свое разсуждение паче предпочитающим не токмо зде кратко собранное писание, но и аще и всего мира свидетели представиши успети ничтож возможеши. О таковых бо речеся: Егда бо кто совратится разумом, тогда писание того не ползует.